المالتيميديا للجميع !!

القراءة للجميع !!

واحد من المشاريع القومية الكبرى القليلة اللي الواحد عاشها من بدايتها فى ال 20 سنة الماضية !

المشروع الحقيقة كان هدفه نشر الثقافة بين المصريين ووفر كثير جداا من الكتب القيمة باسعار رمزية جدا وكان فيه تشجيع كبير للناس على القراءة ...

مع ذلك مش عارف ليه المشروع موصلش برده للنجاح الساحق .. موصلش لمرحلة ان ابقى شايف كل واحد مصري ماسك كتاب بيقرا فيه !!

مش عارف ايه السبب ؟!؟!

يمكن لان الناس اللي عملت المشروع نسوا ان نسبة كبيرة جدا من الشعب مش بيعرفوا يقروا اويكتبوا !؟!

او ان الناس خلال ال20 سنة دول بقوا ماشيين تايهين بيجروا على اكل عيشهم و مفيش اي وقت ان يمسك كتاب او يقرا اي حاجة !

بس اللي اعرفه اني على الرغم من اني حضرت المشروع من بدايته واني رجل متعلم و لحد دلوقتي بجري على المذاكرة اه
بس برده مش بجري على اكل عيش وعيال لدرجة اني مقدرش امسك كتاب !

ومع ذلك .. انا مش من مشجعي " القراءة للجميع " !

انا من مشجعي "المالتيميديا للجميع" !

انا ليس عندي مشكلة مع القراءة فى حد ذاتها .. لكن لما تدخل معادلة "الوقت" فى الموضوع ، هتلاقيها بتفرق كتير !

ما اقصده .. ان فيلم صغير ساعة ونص ممكن يوفر ليك مش اقل من 70% من معلومات كنت هتخرج بيها عن نفس الموضوع لو قرأت كتاب عنه فى مدة 3 او اربع ايام !

أقرأ مجموعة مجلدات عن الحرب العالمية الاولى والثانية .. فى 4 شهور

ولا اسمع سلسلة افلام ال bbc عن الحرب العالمية الاولى والثانية فى اسبوع !

هي دي المعادلة الصعبة !

الوسائل البصرية والسمعية مميزة جدا فى انجاز الوقت وتحقيق الفايدة و انك تقدر تعرف شئ عن كل شئ ..

مع التطور الرهيب فى التكنولوجيا دلوقتي تقدر فى اي وقت وفى اي مكان تسمع اللي انت عايزه وانت فى المواصلات وانت فى الشارع و انت فى اي مكان ..


على الموبايل Mp3 ، MP4، iphone ، ipad ، لابتوب ، نوت بوك صغير !!

كل الحلول معاك !

حاجة جديدة ظهرت .. الكتب السمعية او ال "Audio Books " !!

حتى الكتب سجلوها بالصوت علشان اللي مش عايز يقراها يسمعها !

بالاضافة طبعا لمساعدة المكفوفين ..

امال فين المشكلة ؟!

المشكلة الحقيقية فعلا هي انك تثق فى اي كلام بتشوفه او تسمعه من غير ما يكون عندك فكرة عنه قبل كده !

وتاخد الكلام فى صورة مسلمات وانه مظبوط 100 % وتفاجئ بعد فترة انه كللله كان غلط .. بس لانك لا تملك اي فكرة عن الموضوع من الاول ودا كان مصدرك الاول والوحيد ..

يعني فى النهاية هتلاقي نفسك مضطر ترجع للكتب .. يمكن مش فى كل حاجة بس فى الحاجات المهمة على الاقل ..

المشكلة التانية فى الفرق فى درو الخيال بين قراءة فى رواية او قصة مثلا ومشاهدة الرواية كعمل مرئي ايا كان نوعه ..

على الرغم من المشكلتين دول .. اجد نفسي دائما اقف بجانب عامل الوقت وخصوصا مع الرتم السريع للحياة التي نعيشها ... لذلك مضطر اقول ..

المالتيميديا للجميع .. واذا ارادت الدولة عمل مشروع يهدف لنشر الثقافة بين جميع ابناء الشعب اعتقد ان الوسائل السمعية والبصرية - التي تتسم بالتخلف الى حد كبير عندنا - هي اسرع الطرق للوصول لهذا الهدف ..

ولا انتم رأيكم ايه ؟!