يا صباح الثورة !!

صباح الثورة !!

صباح التفاؤل !!

صباح الحرية !!

صباح الخير والهناء والسعد عليكي يا بلدي ويا ولاد بلدي !

لاول مرة من فترة كبييييرة اشعر بهذا القدر من التفاؤل !

لما بدأت اكتب من فترة كبيرة فى المدونة وقلت اني خلاص نويت اكتب كل اللي فى قلبي واقول اللي عايز اقوله ، مقدرتش اكتب اي حاجة !

مكنش عندي نفس اشارك حد النظرة السودة اللي انا شايفها لحياتي !

لكن النهاردة يوم جديد بيتكتب فيه بداية عصر جديد تحت سماء الحرية فى بلدي العظيم !

دماغي اتقلبت 180 درجة من امبارح من حالة التشاؤم لحالة التفاؤل واطلاق العنان للاماني !!

افكار كتير عمالة تجري قصاد عيني و عمال اقول انا نفسي فى كذا وكذا و كذا !!

الافكار دي لا هي مرتبة ولا منسقة ولا هي فكرة شاملة لموضوع اصلاح !

دي مجرد فلاشات لحاجات انا نفسي تتغير فى حياتنا !

الفلاشات دي هنسخها زي ما هي من الاستاتس بتاعي على الفيس ، عايز احتفظ بالذكريات دي كلها فى التدوينة دي

• نفسي الأزهر يرجع يكون صوت الحق من تاني !
• نفسي علماء مصر اللي بره ييجوا يعمروا بلدهم !
• نفسي رجال الاعمال المحترمين يشاركوا بكل اللي معاهم فى اعمار البلد اللي كان خيرها عليهم !
• نفسي اروح الكلية ملقاش سعد ولا ولا شبل ولا جمال ديابتس ولا اي حد من المصريين اللي كانوا بيبيعوا جسمهم عشان اكل العيش !
• نفسي ادخل العنبر فى الميري الاقي المرضى كلهم مبسوطين ومرتاحين بالرغم من مرضهم علشان لاقوا اهتمام بيهم رغم انه معهمش فلوس زيهم زي واحد غني !
• نفسي الاساتذة بتوعنا يرحمونا من كلمة دا احنا ايامنا كان ... !!! ويرحمونا من كلمة انكم جيل متخلف وفيه كله الصفات المنيلة !
• نفسي ابقى مبسوط و انا بدرس ارقى العلوم بعد العلم الشرعي "الطب" مش ابقى متكدر وحاسس ان ايامي الجاية كلها سواد و اني ضيعت عمري وشعري شاب و مش هلاقي اشتغل ولا اكل ولا اتجوز !!
• نفسي الكلية يمسكها ناس نفسها تصلح التدريس نفسه مش يبيضوا المباني ويهدوا ويبنوا ويجروا ورا اعتماد اهبل ملهوش معنى من غير ما يصلح التعليم !و فى الاخر نقف على باب الكلية نقول اعتمادنا عليك يا رب !
• نفسي يا عالم يبقى فيه اختراع اسمه Feedback !! كل حاجة تحصل فى اي حتة يبقى معروف بالظبط الناس اللي عاجبها قد ايه و اللي مش عاجبها قد ايه !!
• نفسي مرة واحدة اشوف احصائيات مظبوطة احنا اللي عاملينها يا ناس !!
• نفسي مسمعش تاني عن شباب ماتوا وهم هربانين فى البحر مهاجرين ! و الشباب يحس انه عايش بكرامة فى بلده وميفكرش فى لحظة يهج منها !
• نفسي يبقى عندنا اكتفاء ذاتي ونرجع تاني نصدر القمح والقطن بدل ما نشحتهم ! ونبطل نزرع مانجة وكانتالوب عشان نصدرهم !
• نفسي العلم يبقى اغلى من الفلوس فى البلد دي !
• نفسي السنة الجاية اشتري احدث جهاز الكتروني فى العالم محفور عليه Made in EGYPT !!
• نفسي ميبقاش فى واحد محتاج فى الشارع ومش لاقي ياكل و محدش حاسس بيه !
• وناس تانية قاعدة فى وسط عجايب بورتو سخنة السبعة عند اول تليفريك فى مصر !!
• نفسي اللي فى امريكا واوروبا يبقوا بيتاهافتوا على انهم ييجوا بعثات علمية فى مصر !

النهاردة 12-2-2011 ، يا رب اعيش واشوف الامنيات العشوائية دي اتحققت فى بلدي !